Vilt tú vera við til at tryggja, at fíggjarstýringin hjá BankNordik er góð? Vit sóknast eftir einum starvsfólki, sum dugir at grava niður í tølini, síggja samanhangir og spyrja røttu spurningarnar.

Starvið

Sum ráðgevi á Fíggjardeildini fært tú ein spennandi og fjøltáttaðan gerandisdag. Á Fíggjardeildini fert tú at arbeiða við mánaðarligum roknskapum og øðrum leiðslufrágreiðingum. Vit ímynda okkum, at tú kennir væl til bæði roknskap og dátuviðgerð, har vit serliga koma at brúka Power BI sum amboð.

Fíggjardeildin tekur sær av øllum innanhýsis og uttanhýsis roknskapum, fíggjarætlanum, frágreiðingum, solvensuppgerðum, likviditetsuppgerðum, niðurskrivingum og avsetingum í BankNordik-samtakinum.

Yvirskipaða uppgávan er at taka virknan lut í fjølbroytta arbeiðinum á deildini.

Uppgávurnar fevna m.a um at:

• gera almennu roknskapirnar hjá samtakinum
• uppfylging av fíggjarætlanum og innanhýsis frágreiðingar til leiðslu og nevnd

Førleikakrøv

• Tú hevur cand. merc., HD ella aðra viðkomandi útbúgving og/ella arbeiðsroyndir
• Tú kennir væl til roknskap
• Tú dugir væl at arbeiða við dátum og tølum
• Tú arbeiðir sjálvstøðugt 
• Tú hevur góð analytisk evni
• Tú hevur hug og evni at seta teg inn í nýggjar skipanir
• Tú hevur ein effektivan arbeiðshátt og leggur stóran dent á, at freistir verða hildnar 
• Tú hevur góð samstarvs- og samskiftisevni 

Harafturat vænta vit, at tú ert jalig/ur, fyrikomandi, loysir tínar uppgávur við nærlagni og tekur virknan lut í at skapa eitt gott arbeiðsumhvørvi.

Vit bjóða

Eitt spennandi og sjálvstøðugt starv í einum góðum og nútímans arbeiðsumhvørvi. Í BankNordik leggja vit stóran dent á trivnað og menning, og sum starvsfólk í samtakinum hevur tú góðar møguleikar fyri fakligari og persónligari menning. 

Tú verður partur av einum fakliga sterkum og eldhugaðum toymi, ið umsitur fíggjarviðurskiftini fyri alt samtakið. Tú fært sostatt innlit í føroysk og grønlendsk fíggjarviðurskifti.

Setanartreytir verða avtalaðar eftir royndum og førleikum.

Um okkum

BankNordik-samtakið hevur deildir í Grønlandi og Føroyum umframt tryggingar- og húsameklararvirksemi í Føroyum. Umleið 200 starvsfólk eru í samtakinum. Vit leggja okkum eftir at seta dugnalig, ágrýtin og fjølbroytt starvsfólk, og vit eru harumframt tilvitað um kynsbýtið á leiðslustigi og á deildum.

Umsókn

Tú søkir starvið her. Umsóknir skulu vera okkum í hendi í seinasta lagi mánadagin 18. apríl 2022.

Vilt tú hava meira at vita um starvið, ert tú vælkomin at seta teg í samband við Cecil Weihe, fíggjarleiðara á cw@banknordik.fo, tlf. 230 345, ella Arnhold Olsen, fíggjar- og analysuleiðara á ao@banknordik.fo, tlf. 230 475.