BankNordik-savnið
Tann 18. januar 2017 setti bankin á stovn BankNordik-savnið og gav samstundis savninum 623 listaverk í gávu. Høvuðsendamálið við savninum er at varðveita og geva øllum áhugaðum atgongd til at síggja tey mongu áhugaverdu listaverkini, sum bankin hevur keypt gjøgnum árini. Harumframt er eitt av endamálunum at menna listasavnið og føroyska list.
Sjálvsognarstovnur
BankNordik-savnið er skipað sum ein sjálvsognarstovnur, og tey 623 listaverkini í stovnsfænum vórðu virðismett til 5.040.000 kr. Umframt listaverkini lat bankin savninum 250.000 kr. í byrjanarpeningi og 150.000 kr. til árliga raksturin í 2017, 2018, 2019, 2020 og 2021.
“Vit hava tikið stig til at stovna BankNordik-savnið, til tess at fleiri kunnu fáa gleði av listaverkunum. Listagoymslan hjá bankanum er so mikið stór, at øll listin als ikki rúmast á bankadeildum og í bygningum okkara kring landið. Tí hava verkini ikki fingið ta sjónligheit, sum tey av røttum hava uppiborið, og hetta vilja vit nú broyta. Við nýggja BankNordik-savninum tryggja vit, at listin kemur til sín rætt og verður umsitin og viðlíkahildin á tryggan og virðiligan hátt,” segði Árni Ellefsen, forstjóri í Føroya Banka, í sambandi við stovnanina av savninum.
BankNordik-savnið skipar m.a. fyri sersýningum og lænir listaverk út til søvn umframt almennar og privatar stovnar. Á henda hátt kunnu verkini fáa nýtt lív og skapa gleði fyri øll, sum hava áhuga fyri list.
Serstøk játtan til føroyska nútíðarlist
Í 2020 gjørdi BankNordik av at lata BankNordik-savninum 150.000 kr. um árið til at keypa føroyska nútíðarlist fyri. Serstaka peningaliga játtanin hevur til endamáls at endurnýggja og framtíðartryggja savnið, so tað í størri mun endurspeglar nútíðina í listarligum høpi. Serstaka árliga játtanin verður í fyrsta umfari latin frá 2020 til 2024, og tað er stýrið fyri BankNordik-savnið, ið skal umsita stuðulsjáttanina og keypa listaverk til savnið. Í avtaluni er ásett, at árliga stuðulsupphæddin skal brúkast til at keypa nýggja føroyska upprunalist, ið er framleidd av virknum listafólkum.
Stýrið fyri BankNordik-savnið
BankNordik-savnið hevur fýra stýrislimir, ið gera uppskot til árligu skránna fyri virksemið hjá stovninum. Stýrið er sett saman soleiðis, at tað bæði umboðar kunnleika um føroyska list og innlit í fíggjar- og handilslig viðurskifti. BankNordik velur formannin, og Føroya Kommunufelag, Føroya Arbeiðsgevarafelag og LISA velja hvør sín stýrislim. Í stýrinum eru Helgi A. Fossádal, formaður, Jákup Simonsen, vegna Føroya Kommunufelag, Árni Winther, vegna Føroya Arbeiðsgevarafelag og Guðrið Poulsen vegna LISA.
Umframt at umsita og varðveita listaverkini í BankNordik-savninum er endamálið eisini at menna savnið og stuðla menningini av føroyskari list. Stýrið kann eitt nú velja at selja listaverk og brúka sølupeningin til keyp av nýggjum listaverkum. Listaverkini, sum Føroya Landsstýri sambært avtalu við BankNordik hevur forkeypsrætt til, eru ikki partur av BankNordik-savninum.
