Bústaðarsølan stig fyri stig
Umhugsar tú at selja, er tað eitt gott hugskot at leita tær ráðgeving hjá ognarmeklara ella advokati. Á tann hátt kanst tú fáa eina meting av bústaðnum umframt ráðgeving um sølutilgongdina.
Eisini mæla vit tær til at tosa við okkum tíðliga í tilgongdini, so tú kanst fáa greiðu á, hvussu eina søla fer at ávirka tíni fíggjarviðurskifti.
Annaðhvørt tú selur sjálv/ur ella brúkar serkøna ráðgeving, kann tað vera skilagott at fáa ein serkønan at gera eina meting av húsunum. Á tann hátt fært tú eina ábending um, hvønn prís tú kanst vænta tær.
Privat søla setur krøv til tín
Um tú ynskir at selja bústaðin uttan at brúka ognarmeklara ella advokat, sparir tú útreiðslurnar til hesa ráðgeving. Hinvegin setir hetta sera stór krøv til tín, tí tað er ein rúgva av viðurskiftum, ið tú skalt hugsa um, tá ið tú selur eina ogn. Minst til, at tú hevur ábyrgd av, at allar upplýsingar, ið tú gevur keypara, eru rættar. Um tú gert okkurt mistak, kann tað enda við einum endurgjaldskravi. Tí kunnu pengarnir til serkøna ráðgeving í flestu førum væl løna seg.
Serkøn hjálp kostar, men gevur tryggleika
Velur tú at brúka ognarmeklara ella advokat, fært tú serkøna hjálp frá fólki, ið dagliga taka sær av bústaðarsølu, og sum tí hava holla vitan innan økið. Tú kanst velja, um tú vilt hava ráðgeving til alla sølutilgongdina, ella um tú bert vilt hava hjálp til t.d. virðismeting, húsaskoðan og skeyti.
Velur tú at fáa serkøna hjálp til alla tilgongdina, verða øll praktisk viðurskifti í sambandi við søluna avgreidd fyri teg. Advokatur ella ognarmeklari lýsa bústaðin til sølu fyri teg og taka sær av boðum, ið koma inn, umframt at bústaðurin verður sýndur fram fyri áhugaðum keyparum fyri teg. Eisini verða øll neyðug skjøl gjørd, eins og tú hevur vissu fyri, at alt verður gjørt eftir forskriftunum.
Tá keyparin er funnin
Tá keyparin er funnin og prísurin avtalaður skal keypsavtalan undirskrivast. Vit mæla tær til at fáa serkøna hjálp til tess at tryggja, at øll fíggjarlig og løgfrøðilig viðurskifti verða rætt handfarin. Tosa tí við ein advokat ella ognarmeklara, tá ið søluavtalan skal gerast.
Um tú selur sjálv/ur, skalt tú eisini seta teg í samband við okkum, tá ið keyparin er funnin, so vit kunnu avtala, hvagar peningurin frá søluni verður fluttur.
